धनुषा। धनुषाको मिथिला नगरपालिका-६, ढल्केबरस्थित पूर्व-पश्चिम महेन्द्र राजमार्गमा मोटरसाइकलको ठक्करबाट एक महिलाको मृत्यु भएको छ भने आठ महिनाको शिशुसहित तीन जना घाइते भएका छन्।
जिल्ला प्रहरी कार्यालय धनुषाका अनुसार दुर्घटनामा मिथिला नगरपालिका-६, ढल्केबरकी ३१ वर्षीया बिनिता कुमारी महतो गम्भीर घाइते भएकी थिइन्। उनलाई उपचारका लागि प्रादेशिक अस्पताल जनकपुर पठाइएकोमा चिकित्सकले मृत घोषणा गरेका हुन्।
दुर्घटनामा १६ वर्षीया अनुष्का कुमारी महतो र आठ महिनाको शिशु घाइते भएका छन्। साथै मोटरसाइकल चालक मिथिला नगरपालिका-८, जमुनिवासका ३२ वर्षीय प्रकाश थिङ पनि घाइते भएका छन्।
घाइतेहरूको ढल्केबरस्थित एक निजी स्वास्थ्य संस्थामा उपचार भइरहेको प्रहरीले जनाएको छ। घटनाबारे थप अनुसन्धान भइरहेको छ।
